» » СОДДАЛАР "ХАЛОСКОРИ" (Суд очерки)

ЖАМИЯТ ВА ХАЁТ

СОДДАЛАР "ХАЛОСКОРИ" (Суд очерки)

"Тани жонингиз ҳаққи, садақа қилинг", "Чеҳрангиздан фалокат аломатини сезаяпман, фол очиб кўрай". Кўча-куйда, баъзан, хонадонларда ҳам шу хилдаги гап-сўзлар билан кимларнидир авраётганлар учрайди. Кўпчилик олдида бу гапларга унчалик эътибор бермаётганлар ҳам гоҳида кўнгли қандайдир нохушликни сезгандай, тақдирини олдиндан билгиси келади. Бировларнинг кўнглига ғулғула солиш эвазига пул топишни мақсад қилган кимсалар эса бундай вазиятлардан жуда унумли фойдаланишади.
Қашқадарёлик Шайдо Сатторова билан Дилдора Кулаповалар ана шундай фирибгарликлари эвазига бир неча бор судланган. Ш.Сатторова беш марта, унинг шериги эса бир марта Ўзбекистон Республикаси Жиноят кодекси 168-моддаси, 2-қисмининг тегишли бандлари билан айбли деб топилган. Ҳар гал уларнинг пушаймонлиги "том айлангунча" давом этган.
Қуйидаги воқеа тафсилоти уларнинг кўп бора содир этган қилмишларидан бири. Содда одамлар эса барибир топилади. Бу уларнинг "тегирмони"ни юргизаверади.
Паст Дарғом туманининг маҳаллаларидан бирига кирган икки фирибгар бу сафар ишларини "пухта" қилишди. Қайси хонадонга кирса, унинг қўшнисига доир маълумотларни олишдан иш бошлади. Оилада ким бор, бўйи етган қизига совчи келганми, қандай муаммоларга дуч келишган? Шулар ҳақида сўраб-суриштиришди. Ниҳоят, ошиқлари олчи бўлишига ишонишгач, навбатдаги дарвозани тақиллатишди. Эшикни ёшгина келинчак очди.
- Биз қўшнингизнинг қизига сов-чиликка келдик. Унинг ахлоқ-одоби ҳақида суриштирмоқчимиз. Қўшни қиз тўғрисида уйларингда яхшироқ биладиган кекса одам борми? - сўрайди Шайдо хонадон бекасидан.
- Одобли, меҳнаткаш қиз у. Ўзим бошқа ердан бу ерга келин бўлиб тушганман. Уларнинг насл-насаби ҳақида қайнонам билади. Уйга кира қолинглар, ўзи билан суҳбатлашасизлар.
Айни шу таклифни кутиб турган икки аёл остона ҳатлаб, айвонда ўтирган нуроний онахонга яқинлашишди. У киши билан ҳол-аҳвол сўрашиб улгурмасдан, "Меҳмон"лардан бири бошини баланд кўтариб, ҳаводан ниманидир илғаётгандек, ҳидлай бошлади. Уларнинг бу қилиғига қараб турган кекса аёлнинг кўнглига ғулғула тушди.
- Тинчликми, нима гап?
- Хонадонингизда юз берадиган бир фалокатни илғадим. Бу фалокат оилада турмушга чиқмаган қиз билан боғлиқ- дея гаплари "нишон"га тегишини кузатиб турди.
-Нима гап, тезроқ айта қол. Ҳақиқатан ҳам, қизимнинг тўйи қайтадиган бўлиб турибди. Бўлғуси куёв билан айтишиб қолибди. Ишқилиб, бахти очилиб кетармикан? - худди халоскорини топгандай келганларга мўлтираб қаради онахон.
- Дуо ўқиб, фалокатни аритиш керак. Анча-мунча харажатга тушасиз. Хоҳласангиз, ўзим дуо ўқийдиган танишимнинг манзилини бераман. Лекин фалокат муддати яқин кўринади, - деб ўзининг боши қотгандек қилиб кўрсатган аёл зимдан яна кузатди. Уй соҳибасининг ташвишли нигоҳларини кўриб, "раҳми" келгандай муд¬даога кўчди. - Майли, сизга битта ёрдамим, дуо ўқийман. Фақат тўрт кило хом гўшт, битта қора товуқ зарур. Дуо ўқиб, фалокатни аритаётганимда, қора товуқ қўлимда жон берса, ижобати шу. Товуқ тирик қолса, қизингиз бир кор-ҳолга йўлиқади-ёв.
Хонадон бекалари шошиб қолишди. Гўшт, тирик товуқ олиб келиб, ҳалигиларнинг қўлига тутқазишди. Сўнг ўзича пичирлаб нималарнидир ўқиётган Шайдонинг овозига "маҳлиё" бўлиб қолишди. У эса секингина товуқнинг томоғини қисиб, бутун эътиборини ўзига жалб қилганча, кўзлари ола-кула бўлиб, мисоли шайтон билан "олишарди". Бир вақт қарашсаки, бирозгина олдин тирик бўлган товуқ "дуогўй"нинг қўлида жон таслим қилди. Уйдагилар бари енгил тортишди. Шайдо ҳам ҳорғин қиёфада "дуо"лари ижобат бўлганини билдирди. Сўнг хонадоннинг келин ва қизига майда-майда тошчалар териб келишни буюрди. Битта бармоғини ип билан боғлаб, игна билан қонини чиқарди.
- Энди етти жуфт тилла тақинчоқ керак. Шу орқали қонни сўриб ташлашим лозим. Акс ҳолда, ўқиганларим ўрнига ўтмайди.
Дастлаб хонадон эгаси қулоғидаги зиракни ечиб берди. Кейин келини ва қизи ҳам бисотларидаги барча тилла тақинчоқларни қўш- қўллаб Шайдога топширди. У эса 7 миллион бир юз сўмлик тилла тақинчоқларни чўнтагидан чиқарган пахтага ўрай бошлади. Ишини тугатгач, хизмати эвазига берилган икки юз минг сўмни чўнтагига солар экан, пахтага ўралган нарсаларни устидан ип билан обдон боғлаб, эгаларига қайтарди.
- Буни фақат кун ботгач, очасизлар, - деб тайинлади-ю, хайр-маъзур қилишди. Кўчага уларни кузатиб чиққан уй эгаларининг кўз ўнгида йўловчи "Дамас"га ўтиришди. Бирор километр йўл босишгач, машинани тўхтатишиб, бошқа бир уловга чиқишди.
Бу вақт мўлтони аёллар "дуо"сидан мамнун уйдагилар ўзаро баҳслашишарди.
- Келинг, она, шу матоҳни очиб кўрайлик, - сўрайди қизи.
- Эшитдинг-ку, кун ботгач, очамиз. Дуо бидан товуқни ўлдирди-я. Айтганини қилайлик, - эътироз билдирди онаси.
- Мана шундай аёллар кўпларни чув туширишаркан. Ҳарқалай, пахтани ичидагиларни кўриб қўйсак, ёмон бўлмасди…
Баҳс-мунозаралардан сўнг ўралган пахтанинг ипларини ечиб, очиб кўришди. Унинг ичида ўзлари териб берган тошлар қатор тизилиб турарди. Ҳангу манг бўлган аёллар фирибгарларни излашга тушишди. Аммо уларни ҳеч қаердан топишолмади. Минг истиҳола билан шу воқеадан сўнг бир кун ўтиб, ички ишлар органларига мурожаат қилишди.
Фирибгарнинг ҳам доим "ошиғи олчи" бўлавермайди. Шайдо Сатторова ва Дилдора Кулаповаларнинг одамларни алдаб, ўз манфаатлари йўлида фирибгарлик билан кун кечиришлари оқибати "вой" бўлди. Улардан бирига бир йилу тўққиз ой ахлоқ тузатиш ишлари ҳамда энг кам иш ҳақининг юз баробари миқдорида, иккинчисига ҳам шу миқдорда жарима ҳамда бир йил озодликни чеклаш жазоси тайинланди.
О.АЛЛАЕВ,
жиноят ишлари бўйича туман судининг судьяси,
Б.ШУКУРОВ,
журналист.
скачать dle 11.3
Калит сўз Очерк

Ўхшаш янгилик

Янгиликдаги изоҳлар

Ҳурматли фойдаланувчи, Сиз сайтимиздан рўйхатдан ўтмаганмисиз.
Унда марҳамат Рўйхатдан ўтинг.

Ўзингизнинг изоҳингизни қолдиринг:

Ижтимоий тармоқлар

  • Фэйсбук
  • Твиттер
  • Телеграм
  • Сайт материалларидан фойдаланилганда WWW.PDH.UZ манбаи курсатилиши шарт.

    Тезкор алоқа

  • Админ билан алоқа телеграм

    Журналистлар

    Манзилимиз

    Самарқанд вилояти
    Паст Дарғом тумани, Жума шаҳри,
    Амир Темур кўчаси, 50-уй.

    Телефон : ( 8366 ) 465-12-56