Бош Сахифа » Янгиликлар » НАЙМАНДАГИ МАКТАБ БОШҚА МУАССАСАЛАРГА НАМУНА

 
 
 

НАЙМАНДАГИ МАКТАБ БОШҚА МУАССАСАЛАРГА НАМУНА

Муаллиф: 013101 дан 26-01-2017, 15:59, курилди: 521

0
НАЙМАНДАГИ МАКТАБ БОШҚА МУАССАСАЛАРГА НАМУНА

Шаҳло Саидмуродова раҳбарлик қилаётган 56-умумтаълим мактабида "Ватан ҳимоячилари куни"га бағишланган тадбир қизиқарли кечди. Унда истеъфодаги подполковник Мухтор Азизов, Самарқанд горнизони офицерлар уйи қошидаги ҳарбий оркестр ҳамда сафарбарлик чақирув резерви вакиллари Бобомурод Абдуқодиров, Зоҳид Тожибоевлар ўқувчиларга ҳарбийликнинг машаққатлари, шон-шарафи ҳақида тушунчалар беришди. Тадбирдан сўнг меҳмонлар билан мактаб ҳаёти билан танишиш жараёнидаги таассуротлар бир олам. Эътиборимизни тортган жиҳати, мактаб-маҳалла-оила ҳамкорлигининг тўғри йўлга қўйилганлиги бўлди.
- Катта раҳмат. Фарзандимизнинг яхши ўзлаштираётганини инобатга олиб уйимизга ташаккурнома йўллабсизлар. Эътибордан бошимиз кўкка етди, - деди муассаса ҳовлисига кириб келган киши. У одамнинг гапларини директор изоҳлади:
- Рейтинг кўрсаткичи юқори ўқувчиларнинг уйларига ташаккурнома юбораётганимиз ота-оналарнинг фарзандига эътиборини ошираяпти. Ўар ой 10-15 оилага шундай миннатдорчилик хатлари жўнатамиз. Бу орқали ота-она мактабимизда ўқиётган фарзанди ахлоқи, фанларни ўзлаштиришидан хабардор бўлади. Жамоадошларимизнинг оилаларига ҳам шундай ташаккурномалар уюштираяпмиз. Натижада ким қандай ишлаётганидан нафақат жамоа, ўқитувчининг оила аъзолари ҳам воқиф бўлди.
Дарслар тугаган, лекин айрим синфхоналар гавжум. Билишимизча, ҳар бир фан кесимида ўқитувчилар болалар билан қўшимча машғулотлар олиб боришмоқда. Шу боис, фанлардан ўзлаштириши паст болалар деярли йўқ. Бундай ҳолатни мактаб кутубхонасида ҳам кузатдик.
- Ҳар бир бола бир йилда камида 25 та бадиий асар ўқиши лозим, - деб кутубхонадаги гавжумликка ишора қилди Шаҳло Саидмуродова. - Тўғри, айрим оилаларда бадиий адабиётга эътибор оз бўлиши мумкин. Фарзанди учун шунча китоб сотиб олиб беришмайдиганлар ҳам бор. Масалани бу жиҳати ҳам эътиборимиздан четда эмас. Ҳар бир ўқувчига туғилган кунида оиласидан қандай китоб совға қилинганлигини синф раҳбарлари назорат қилишади. Бундан ташқари, билим даргоҳимизда ҳар йили январь ойида "Китобим - офтобим" хайрия марафони ўтказиш анъанага айланган. Бу тадбирга тадбиркорлар, ҳунармандлар, маҳалла фаоллари, ота-оналар таклиф этилади. Тадбирга ташриф буюрган киши албатта, кутубхонамиз фондини бойитиш учун озми-кўпми ҳиссасини қушади. Маҳалладагилар бу анъанага содиқ. Айрим кишилар тадбирнинг эртаси куни ҳам четда қолмаслик учун 4-5 тадан китоб сотиб олиб топширишади. Айни пайтда кутубхонамиз фондида 1500 дан ортиқ китоб мавжуд. Бу ўқувчи билим олиши, дунёқараши кенгайиши учун яратилган катта имконият. Бу йилги марафонда энг кўп китоб топширган 6-синф ўқувчиларининг ота-оналарига маъмурият томонидан ташаккурнома йўлладик. Айтганча, бу галги марафонда 6-синф ўқувчиларининг ота-оналари саъй-ҳаракатлари билан мактаб кутубхонаси фонди 249 тага кўпайди.
Инглиз тили хонаси ўқитувчилар билан гавжум. Инглиз тили фани ўқитувчиси Элноза Маматқулова касбдошларига чет тилидан машҚулот ўтаётганди. Таъкидланишича, 4 йилдан буён болаларга чет тилидан сабоқ бераётган муаллима бўш вақтларида жамоадошларига ҳам ўз фани сир-асрорларини ўргатаркан. Янги педагогик технологиялар, интерфаол усулда дарсларни ташкил этиши самараси ўлароқ, 9-синф ўқувчиси Дилноза Облақулова фан олимпиадасининг вилоят босқичига йўлланмани қўлга киритибди. Фан кабинетини кўздан кечирамиз. "Инглиз тили бурчаги", "Чет тилини ўрганамиз" стендлари дид билан безатилган. Ҳафтанинг икки куни чет тили фани бўйича тўгараклар ташкил этилган. Муаллима дарс бераётган ўқувчилар 70 фоиз чет тилини ўзлаштиришганининг гувоҳи бўлдик. "Энг яхши инглиз тили ўқитувчиси" номинацияси туман ғолиблиги бежизга Э.Маматқуловага берилмаганига амин бўлдик.
- Болалар билан доимий турли мавзуларда тадбирлар ўтказилаётгани самара бермоқда, - дейди директор ўринбосари Дилрабо Худойқулова. - Бу ўз навбатида, болаларни Ватанга муҳаббат, буюк алломаларга муносиб ворислар бўлиб камол топишида муҳим аҳамият касб этади. Тадбирларга юқори савияда тайёргарлик кўришда Эътибор Худойқулова, Манзура Худойқулова, Нигора Жўраева, Мақсуда Обидова сингари ўқитувчиларнинг ҳиссаси катта. 438 нафар ўқувчиларимизни кўча-куйда ҳам "танишади". Бир хил мактаб либоси қатъий жорий қилинган.
Найман маҳалласидаги мазкур таълим муассасасида 33 нафар жонкуяр педагоглар хизматидан аҳоли мамнун. Изланиш, интилиш жамоанинг ҳар бир аъзосига хос фазилат. Буни услубий қўлланмалар, матбуот нашрларини қўлма-қўл ўқиб ўрганаётган, замон билан ҳамқадам одимлаётган илм даргоҳининг ҳар бир ўқитувчиси мисолида кўриш мумкин.
Қиёмжон ЗИЁТОВ.

Йўналиш: Янгиликлар

Ҳурмтли меҳмон, Сиз ҳали руйхатдан утмагансиз.
Сиз малумот қолдиришингиз учун Рўйхатдан утиш лозим.